ကျိုင်းတုံခရိုင်တရားရုံးသို့ ကျိုင်းတုံတက္ကသိုလ်၊ ဥပဒေပညာဌာနမှ ကျောင်းသား၊ကျောင်းသူများ လေ့လာရေးလာရောက်ခြင်း

ကျိုင်းတုံခရိုင်တရားရုံးသို့ ကျိုင်းတုံတက္ကသိုလ်၊ ဥပဒေပညာဌာနမှ ကျောင်းသား၊ကျောင်းသူများ လေ့လာရေးလာရောက်ခြင်း

          ကျိုင်းတုံတက္ကသိုလ်၊ ဥပဒေပညာဌာနမှ ကျောင်းသား၊ကျောင်းသူ (၂၈)ဦးသည် ကြီးကြပ်သူဆရာမ (၆)ဦးလိုက်ပါလျက် ၂၀၂၆ ခုနှစ်၊ ဖေဖော်ဝါရီလ (၂၇)ရက်နေ့တွင် ကျိုင်းတုံခရိုင်တရားရုံးသို့ လေ့လာရေးလာရောက်ခဲ့ပါသည်။

          လေ့လာရေးအစီအစဥ်တွင်  ကျိုင်းတုံခရိုင်တရားရုံး ခရိုင်တရားသူကြီး ဦးစည်သူဝင်းက ပြည်ထောင်စုတရားလွှတ်တော်ချုပ်နှင့် တရားရုံးအဆင့်ဆင့်ဖွဲ့စည်းပုံ၊ စီရင်ပိုင်ခွင့်အာဏာများနှင့် တရားစီရင်မှုများအကြောင်းကို Power Poin ဖြင့် လည်းကောင်း၊ ဒုတိယခရိုင်တရားသူကြီး ဦးထွန်းမျိုးဌေးက ပြစ်မှု၊ တရားမလက်တွေ့ တရားစီရင်ရေးနှင့် တရားစီရင်ရေးကဏ္ဍပြုပြင် ပြောင်းလဲမှုများအကြောင်းကိုလည်း‌ကောင်း အသီးသီးရှင်းလင်းဆွေးနွေးပြီး ကျိုင်းတုံခရိုင် တရားရုံးနှင့် ကျိုင်းတုံမြို့နယ်တရားရုံးတို့၏ တရားခွင်ထားရှိမှုနှင့် ရုံးဖွဲ့စည်းပုံတို့အား လှည့်လည် ရှင်းလင်းပြသခဲ့ကြောင်း၊ ယင်းနေ့တွင် ချိန်းဆိုထားသည့်ရာဇဝတ်မှုနှင့် တရားမမှုများစီရင် ချက်ချမှတ်ခြင်း၊ အမှုစစ်ဆေးခြင်းတို့ကို ကျောင်းသား/ကျောင်းသူများက တရားခွင်အတွင်း ဝင်ရောက်၍ လေ့လာဆည်းပူးခဲ့ပါသည်။

          Liaison Officer များအဖြစ် ကျိုင်းတုံမြို့နယ်တရားရုံးမှ တွဲဖက်မြို့နယ်တရားသူကြီး ဦးဇော်မျိုးဝင်း (တ/၃၅၉၇)၊ ဒုမြို့နယ်တရားသူကြီး (၁) ဒေါ်နန်းနွံခမ်းဦး (တ/၄၀၉၉)နှင့် ဒုမြို့နယ်တရားသူကြီး (၂) ဒေါ်အိဝေဖြိုး (တ/၄၁၇၀)တို့က ဆောင်ရွက်ခဲ့ပါသည်။ လေ့လာရေး လာရောက်သူ ကျောင်းသား/ကျောင်းသူများအား ပြည်ထောင်စုတရားလွှတ်တော်ချုပ်၏ Website တွင် လွှင့်တင်ထားသော လက်ကမ်းစာစောင်များကို Print ထုတ်၍ ဖြန့်ဝေပေးခဲ့ ပါသည်။ ထို့နောက် ကျိုင်းတုံခရိုင်တရားသူကြီးနှင့် ဒုခရိုင်တရားသူကြီးတို့က လေ့လာရေး အဖွဲ့ခေါင်းဆောင် ကျိုင်းတုံတက္ကသိုလ် ဥပဒေပညာဌာန တွဲဖက် ပါမောက္ခ ဒေါ်စုစုငယ်အား အမှတ်တရလက်ဆောင်တို့ပေးအပ်ခဲ့ပါသည်။  

          လေ့လာရေးအစီအစဉ်တွင် လေ့လာသူ ကျောင်းသား/ကျောင်းသူများအား ပြည်ထောင်စု တရားလွှတ်တော်ချုပ်၏ လုပ်ငန်းစဥ်များနှင့် အကောင်အထည်ဖော် ဆောင်ရွက်လျက်ရှိသည့် တရားစီရင်ရေး ကဏ္ဍပြုပြင်ပြောင်းလဲမှုများကို ကောင်းစွာသိရှိနားလည်စေရန် အသိပညာ ပေးခြင်းကို ဆောင်ရွက်နိုင်ခဲ့ပါသည်။

 

ရှမ်းပြည်နယ်တရားလွှတ်တော်